ਵਿਲੱਖਣ ਵਿਗਿਆਨ ਉਤਸਵ 4 ਤੋਂ 6 ਅਕਤੂਬਰ ਤੱਕ : ਲਵਜੀਤ ਕਲਸੀ

• ਡਿਪਟੀ ਕਮਿਸ਼ਨਰ ਸ਼ੌਕਤ ਅਹਿਮਦ ਪਰੇ ਕਰਨਗੇ ਉਦਘਾਟਨ

ਬਠਿੰਡਾ, 3 ਅਕਤੂਬਰ : ਸੁਸਾਇਟੀ ਫਾਰ ਪ੍ਰਮੋਸ਼ਨ ਆਫ਼ ਸਾਇੰਸ ਐਂਡ ਟੈਕਨਾਲੋਜੀ ਇੰਨ ਇੰਡੀਆ ਵਲੋਂ ਜ਼ਿਲ੍ਹਾ ਪ੍ਰਸ਼ਾਸਨ ਤੇ ਵੱਖ-ਵੱਖ ਵਿਦਿਅਕ ਸੰਸਥਾਵਾਂ ਦੇ ਸਹਿਯੋਗ ਨਾਲ ਸਥਾਨਕ ਡੀਏਵੀ ਕਾਲਜ ਵਿਖੇ 4 ਤੋਂ 6 ਅਕਤੂਬਰ 2023 ਤੱਕ ਲਗਾਏ ਜਾ ਰਹੇ ਪਹਿਲੇ ਵਿਲੱਖਣ ਵਿਗਿਆਨ ਉਤਸਵ ਦੀਆਂ ਤਿਆਰੀਆਂ ਮੁਕੰਮਲ ਕਰ ਲਈਆਂ ਗਈਆਂ ਹਨ। ਇਸ ਵਿਗਿਆਨ ਉਤਸਵ ਦਾ ਉਦਘਾਟਨ ਪਹਿਲੇ ਦਿਨ ਡਿਪਟੀ ਕਮਿਸ਼ਨਰ ਸ਼੍ਰੀ ਸ਼ੌਕਤ ਅਹਿਮਦ ਪਰੇ ਵਲੋਂ ਕੀਤਾ ਜਾਵੇਗਾ। ਇਹ ਜਾਣਕਾਰੀ ਵਧੀਕ ਡਿਪਟੀ ਕਮਿਸ਼ਨਰ (ਵਿਕਾਸ) ਸ਼੍ਰੀਮਤੀ ਲਵਜੀਤ ਕਲਸੀ ਨੇ ਸਥਾਨਕ ਜ਼ਿਲ੍ਹਾ ਪ੍ਰਬੰਧਕੀ ਕੰਪਲੈਕਸ ਦੇ ਮੀਟਿੰਗ ਹਾਲ ਵਿਖੇ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਸਾਂਝੀ ਕੀਤੀ। ਇਸ ਮੌਕੇ ਉਨ੍ਹਾਂ ਦੇ ਨਾਲ ਸੁਸਾਇਟੀ ਫਾਰ ਪ੍ਰਮੋਸ਼ਨ ਆਫ਼ ਸਾਇੰਸ ਐਂਡ ਟੈਕਨਾਲੋਜੀ ਇੰਨ ਇੰਡੀਆ ਦੇ ਪ੍ਰਧਾਨ ਤੇ ਸੇਵਾ ਮੁਕਤ (ਆਈਏਐਸ) ਸਾਬਕਾ ਚੀਫ਼ ਸੈਕਟਰੀ ਹਰਿਆਣਾ ਸ਼੍ਰੀ ਧਰਮਵੀਰ, ਸਾਬਕਾ ਵੀਸੀ ਪੰਜਾਬ ਯੂਨੀਵਰਸਿਟੀ ਚੰਡੀਗੜ੍ਹ ਤੇ ਸੁਸਾਇਟੀ ਦੇ ਉਪ ਪ੍ਰਧਾਨ ਪ੍ਰੋ: ਅਰੁਣ ਕੇ ਗਰੋਵਰ, ਜਨਰਲ ਸੈਕਟਰੀ ਐਸਪੀਐਸਟੀਆਈ ਪ੍ਰੋ: ਕੇਆ ਧਰਮਵੀਰ ਅਤੇ ਵਿੱਤ ਸਕੱਤਰ ਸ਼੍ਰੀ ਮੱਖਣ ਲਾਲ ਗਰਗ ਵਿਸ਼ੇਸ਼ ਤੌਰ ਤੇ ਹਾਜ਼ਰ ਰਹੇ।

ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਵਧੀਕ ਡਿਪਟੀ ਕਮਿਸ਼ਨਰ ਨੇ ਦੱਸਿਆ ਕਿ ਇਹ ਆਪਣੀ ਕਿਸਮ ਦਾ ਪਹਿਲਾ ਵਿਲੱਖਣ ਵਿਗਿਆਨ ਉਤਸਵ ਹੈ। ਉਨ੍ਹਾਂ ਕਿਹਾ ਕਿ 3 ਰੋਜ਼ਾ ਇਹ ਵਿਗਿਆਨ ਉਤਸਵ ਰੋਜ਼ਾਨਾ ਸਵੇਰੇ 10 ਵਜੇ ਸ਼ੁਰੂ ਹੋਵੇਗਾ, ਜੋ ਕਿ ਦੇਰ ਰਾਤ ਤੱਕ ਚੱਲੇਗਾ। ਜਿਸ ਵਿੱਚ ਸਾਇੰਸ ਵਿਸ਼ੇ ਨਾਲ ਸਬੰਧਤ 8ਵੀਂ ਜਮਾਤ ਤੋਂ ਲੈ ਕੇ ਕਾਲਜ, ਯੂਨੀਵਰਸਿਟੀ ਪੱਧਰ ਦੇ ਵਿਦਿਆਰਥੀਆਂ ਵਲੋਂ ਸਮੂਲੀਅਤ ਕਰਕੇ ਸਾਇੰਸ ਪੜ੍ਹਨ, ਸਮਝਣ ਤੇ ਸਾਇੰਸ ਮੰਨੋਰੰਜਨ ਬਾਰੇ ਗਿਆਨ ਹਾਸਲ ਕਰਨਗੇ।

ਮੈਡਮ ਲਵਜੀਤ ਕਲਸੀ ਨੇ ਇਹ ਵੀ ਦੱਸਿਆ ਕਿ ਜੋ ਵਿਦਿਆਰਥੀਆਂ ਕੋਈ ਨਾ ਕੋਈ ਪ੍ਰੋਜੈਕਟਰ ਬਣਾਉਣ ਦੇ ਚਾਹਵਾਨ ਹਨ, ਉਨ੍ਹਾਂ ਨੂੰ ਉਤਸਵ ਦੌਰਾਨ ਸਾਰਾ ਸੰਭਵ ਸਮਾਨ ਉਪਲਬੱਧ ਕਰਵਾ ਕੇ ਉਨ੍ਹਾਂ ਨੂੰ ਹੱਥੀ ਪ੍ਰੋਜੈਕਟ ਬਣਾਉਣ ਦਾ ਮੌਕਾ ਵੀ ਦਿੱਤਾ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਤਿਨੇ ਦਿਨ ਮੇਲੇ ਚ ਸਕੂਲੀ ਵਿਦਿਆਰਥੀਆਂ ਨੂੰ ਲਿਆਉਣ ਲਈ ਜ਼ਿਲ੍ਹਾ ਪ੍ਰਸ਼ਾਸਨ ਵਲੋਂ ਵਿਸ਼ੇਸ਼ ਪ੍ਰਬੰਧ ਕੀਤੇ ਗਏ ਹਨ। ਇਸ ਦੌਰਾਨ ਉਨ੍ਹਾਂ ਦੱਸਿਆ ਕਿ ਇਸ ਵਿਗਿਆਨ ਉਤਸਵ ਦਾ ਮੁੱਖ ਉਦੇਸ਼ ਵਿਦਿਆਰਥੀਆਂ ਤੇ ਨੌਜ਼ਵਾਨਾਂ ਚ ਵਿਗਿਆਨਕ ਉੱਨਤੀ ਤੇ ਕਮਿਊਨਿਟੀ ਵਿਚਕਾਰ ਪਾੜੇ ਨੂੰ ਪੂਰਾ ਕਰਨਾ, ਉਤਸੁਕਤਾ ਅਤੇ ਸਮਝ ਦੇ ਸੱਭਿਆਚਾਰ ਨੂੰ ਉਤਸ਼ਾਹਿਤ ਕਰਨਾ ਹੈ।

ਇਸ ਵਿਗਿਆਨ ਉਤਸਵ ਸਬੰਧੀ ਹੋਰ ਜਾਣਕਾਰੀ ਦਿੰਦਿਆਂ ਸੇਵਾ ਮੁਕਤ (ਆਈਏਐਸ) ਸਾਬਕਾ ਚੀਫ਼ ਸੈਕਟਰੀ ਹਰਿਆਣਾ ਤੇ ਪ੍ਰਧਾਨ ਸੋਸਾਇਟੀ ਫਾਰ ਪ੍ਰਮੋਸ਼ਨ ਆਫ਼ ਸਾਇੰਸ ਐਂਡ ਟੈਕਨਾਲੋਜ਼ੀ ਇੰਨ ਇੰਡੀਆ (ਪੰਚਕੁਲਾ) ਸ਼੍ਰੀ ਧਰਮ ਵੀਰ ਨੇ ਇੱਥੇ ਵਿਗਿਆਨ ਉਤਸਵ ਦੀ ਮੇਜਬਾਨੀ ਕਰਨ ਤੇ ਜ਼ਿਲ੍ਹਾ ਪ੍ਰਸ਼ਾਸਨ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਸੋਸਾਇਟੀ ਆਗਾਮੀ ਤਿੰਨ ਰੋਜ਼ਾ ਰੋਮਾਂਚਿਕ, ‘ਫੈਸਟੀਵਲ ਆਫ਼ ਸਾਇੰਸ ਦੀ ਘੋਸ਼ਣਾ ਕਰਕੇ ਬਹੁਤ ਖੁਸ਼ ਹੈ ਅਤੇ ਇਹ ਵਿਗਿਆਨ ਦਾ ਤਿਉਹਾਰ ਇੱਕ ਅਭੁੱਲ ਅਨੁਭਵ ਹੋਣ ਦਾ ਵਾਅਦਾ ਕਰਦੀ ਹੈ, ਜਿਸ ਵਿੱਚ ਪ੍ਰਸਿੱਧ ਵਿਗਿਆਨੀਆਂ ਦੁਆਰਾ ਦਿੱਤੇ ਗਏ ਗਿਆਨ ਭਰਪੂਰ ਲੈਕਚਰਾਂ ਦੀ ਵਿਸ਼ੇਸ਼ਤਾ ਰਹੇਗੀ।

ਸ਼੍ਰੀ ਧਰਮਵੀਰ ਨੇ ਹੋਰ ਦੱਸਿਆ ਕਿ ਸਾਇੰਸ ਵਿਸ਼ਿਆਂ ਵਿੱਚ ਖਗੋਲ ਵਿਗਿਆਨ, ਜਲਵਾਯੂ ਤਬਦੀਲੀ ਤੇ ਪੰਜਾਬ ਦੇ ਪ੍ਰਸਿੱਧ ਵਿਗਿਆਨੀਆਂ ਦੇ ਸ਼ਾਨਦਾਰ ਯੋਗਦਾਨ ਸ਼ਾਮਲ ਹੋਣਗੇ। ਸਕੂਲਾਂ, ਕਾਲਜਾਂ ਅਤੇ ਯੂਨੀਵਰਸਿਟੀਆਂ ਸਮੇਤ ਕਈ ਵਿਦਿਅਕ ਸੰਸਥਾਵਾਂ ਦੇ ਵਿਦਿਆਰਥੀਆਂ ਨੂੰ ਵਿਗਿਆਨ ਨਾਲ ਸਬੰਧਤ ਗਤੀਵਿਧੀਆਂ ਅਤੇ ਪ੍ਰਦਰਸ਼ਨੀਆਂ ਦੀ ਇੱਕ ਵਿਸ਼ਾਲ ਸ਼੍ਰੇਣੀ ਵਿੱਚ ਸ਼ਾਮਲ ਹੋਣ ਦਾ ਮੌਕਾ ਮਿਲੇਗਾ। ਫੈਸਟੀਵਲ ਦੀਆਂ ਮੁੱਖ ਗੱਲਾਂ ਵਿੱਚ ਮਨਮੋਹਕ ਵਿਗਿਆਨ ਪ੍ਰਦਰਸ਼ਨ, ਅਤਿ-ਆਧੁਨਿਕ 3-D ਪ੍ਰਿੰਟਿੰਗ ਸ਼ੋਅਕੇਸ, ਮਨਮੋਹਕ ਰੋਬੋਟਿਕਸ ਅਤੇ ਡਰੋਨ ਟੈਕਨਾਲੋਜੀ ਡਿਸਪਲੇ, ਕਠਪੁਤਲੀ ਦੁਆਰਾ ਨਵੀਨਤਾਕਾਰੀ ਵਿਗਿਆਨ ਸੰਚਾਰ, ਖਗੋਲ-ਵਿਗਿਆਨ ਦੇ ਅਸਮਾਨ-ਨਜ਼ਰ ਰੱਖਣ ਵਾਲੇ ਸੈਸ਼ਨ, ਵਿਗਿਆਨ ਦਾ ਇੱਕ ਦਿਲਚਸਪ ਸਰਕਸ, ਜੀਵਨ ਦੇ ਸੂਝਵਾਨ ਪ੍ਰਦਰਸ਼ਨ ਸ਼ਾਮਲ ਹਨ। ਨੈਸ਼ਨਲ ਡਿਜ਼ਾਸਟਰ ਰਿਸਪਾਂਸ ਫੋਰਸ (ਐਨ.ਡੀ.ਆਰ.ਐਫ.) ਦੁਆਰਾ ਉਪਕਰਨ ਅਤੇ ਕੁਇਜ਼ ਅਤੇ ਪੋਸਟਰ ਬਣਾਉਣ ਦੇ ਮੁਕਾਬਲੇ ਹੋਣਗੇ।

ਇਸ ਮੌਕੇ ਪ੍ਰੋ: ਕੇਆ ਧਰਮਵੀਰ, ਜਨਰਲ ਸੈਕਟਰੀ (ਐਸਪੀਐਸਟੀਆਈ) ਨੇ ਦੱਸਿਆ ਕਿ ਇਹ ਉਤਸਵ ਉਭਰਦੇ ਵਿਦਿਆਰਥੀ ਇਨੋਵੇਟਰਾਂ ਨੂੰ ਪ੍ਰਦਰਸ਼ਨੀਆਂ ਰਾਹੀਂ ਆਪਣੇ ਸੂਝਵਾਨ ਵਿਚਾਰਾਂ ਅਤੇ ਪ੍ਰੋਜੈਕਟਾਂ ਨੂੰ ਪ੍ਰਦਰਸ਼ਿਤ ਕਰਨ ਲਈ ਇੱਕ ਪਲੇਟਫਾਰਮ ਪ੍ਰਦਾਨ ਕਰੇਗਾ। ‘ਵਿਗਿਆਨ ਦਾ ਤਿਉਹਾਰ-ਵਿਗਿਆਨ ਉਤਸਵ’ ਗਿਆਨ, ਨਵੀਨਤਾ ਤੇ ਵਿਗਿਆਨਕ ਖੋਜ ਦੀ ਭਾਵਨਾ ਦਾ ਜਸ਼ਨ ਹੋਣ ਦਾ ਵਾਅਦਾ ਕਰਦਾ ਹੈ। ਹਰ ਕਿਸੇ ਨੂੰ ਵਿਗਿਆਨ ਦੇ ਦਿਲਚਸਪ ਸੰਸਾਰ ਤੇ ਦਿਲਚਸਪ ਯਾਤਰਾ ਵਿੱਚ ਸ਼ਾਮਲ ਹੋਣ ਲਈ ਸੱਦਾ ਦਿੱਤਾ ਜਾਂਦਾ ਹੈ। ਇਸ ਦੌਰਾਨ ਉਨ੍ਹਾਂ ਇਹ ਵੀ ਕਿਹਾ ਕਿ ਤਿੰਨੇ ਦਿਨ ਮੋਬਾਇਲ ਬੱਸ ਸਾਇੰਸ ਲੈਬਾਰਟੀ (ਸਰਕਸ ਆਫ਼ ਸਾਇੰਸ) ਵਿਸ਼ੇਸ਼ ਖਿੱਚ ਦਾ ਕੇਂਦਰ ਰਹੇਗੀ। ਇਸ ਬੱਸ ਵਿੱਚ ਸਾਇੰਸ ਅਤੇ ਗਣਿਤ ਵਿਸ਼ੇ ਨਾਲ ਸਬੰਧਤ ਪ੍ਰਯੋਗਸ਼ਲਾਵਾਂ ਦਾ ਵਿਦਿਆਰਥੀ ਲਾਹਾ ਲੈ ਸਕਣਗੇ।

ਇਸ ਮੌਕੇ ਵਿੱਤ ਸਕੱਤਰ ਸ਼੍ਰੀ ਮੱਖਣ ਲਾਲ ਗਰਗ ਨੇ ਦੱਸਿਆ ਕਿ ਪਹਿਲੇ ਦਿਨ ਸਾਇੰਸ ਵਿਸ਼ੇ ਨਾਲ ਸਬੰਧਤ ਪੋਸਟਰ ਮੇਕਿੰਗ ਮੁਕਾਬਲਿਆਂ ਤੋਂ ਇਲਾਵਾ ਕਾਲਜੀ ਵਿਦਿਆਰਥੀਆਂ ਦੇ ਸਾਇੰਸ ਵਿਸ਼ੇ ਨਾਲ ਸਬੰਧਤ ਕੁਇੰਜ਼ ਮੁਕਾਬਲੇ ਵੀ ਹੋਣਗੇ। ਇਸ ਤੋਂ ਇਲਾਵਾ ਪ੍ਰਸਿੱਧ ਸਾਇੰਸਦਾਨਾਂ ਵਲੋਂ ਲੈਕਚਰ ਦਿੱਤਾ ਜਾਵੇਗਾ। ਇਸ ਮੌਕੇ ਸਾਇੰਸ ਵਿਸ਼ੇ ਨਾਲ ਸਬੰਧਤ ਵੱਖ-ਵੱਖ ਤਰ੍ਹਾਂ ਦੀਆਂ ਸਟਾਲਾਂ ਤੋਂ ਇਲਾਵਾ ਸਾਇੰਸ ਸ਼ੋਅ ਵੀ ਵਿਦਿਆਰਥੀਆਂ ਲਈ ਵਿਸ਼ੇਸ਼ ਖਿੱਚ ਦਾ ਕੇਂਦਰ ਰਹੇਗਾ।

ਇਸ ਦੌਰਾਨ ਉਪ ਜ਼ਿਲ੍ਹਾ ਸਿੱਖਿਆ ਅਫ਼ਸਰ ਸੈਕੰਡਰੀ ਸ਼੍ਰੀ ਸ਼ਿਵ ਪਾਲ ਗੋਇਲ, ਉਪ ਜ਼ਿਲ੍ਹਾ ਸਿੱਖਿਆ ਅਫ਼ਸਰ ਸ੍ਰੀ ਇਕਬਾਲ ਬੁੱਟਰ ਆਦਿ ਹਾਜ਼ਰ ਸਨ।